ਵਿਵਾਦ ਤੋਂ ਬਾਅਦ Giva ਨੇ ਵਾਪਸ ਲਿਆ ਕ੍ਰਿਤੀ ਸੈਨਨ ਦਾ ਰੱਖੜੀ ਵਾਲਾ ਐਡ, ਟ੍ਰੋਲਿੰਗ ਵਿਚਾਲੇ ਕੰਪਨੀ ਨੇ ਦਿੱਤਾ ਸਟੇਟਮੈਂਟ

Kriti Sanon: ਬਾਲੀਵੁੱਡ ਅਦਾਕਾਰਾ ਕ੍ਰਿਤੀ ਸੈਨਨ ਇਸ ਸਮੇਂ ਸੁਰਖੀਆਂ ਵਿੱਚ ਹੈ। ਵਜ੍ਹਾ ਹੈ ਜੂਲਰੀ ਬ੍ਰਾਂਡ ਦਾ ਰੱਖੜੀ ਸਪੈਸ਼ਲ ਵਿਗਿਆਪਨ, ਜਿਸ ਵਿੱਚ ਅਭਿਨੇਤਰੀ ਨੇ ਬ੍ਰਾਲੇਟ-ਸਟਾਈਲ ਬਲਾਊਜ਼ ਅਤੇ ਕੇਪ ਪਾਇਆ ਹੋਇਆ ਸੀ। ਪਹਿਲਾਂ, ਉਨ੍ਹਾਂ ਦੀ ਡਰੈੱਸ ਅਤੇ ਫਿਰ ਉਨ੍ਹਾਂਦੇ ਕੁੱਤੇ ਨੂੰ ਰੱਖੜੀ ਬੰਨ੍ਹਣ ਨੇ ਸੋਸ਼ਲ ਮੀਡੀਆ ‘ਤੇ ਵੱਡਾ ਵਿਵਾਦ ਛੇੜ ਦਿੱਤਾ। ਕੁਝ ਯੂਜਰ ਨੇ ਵਿਗਿਆਪਨ ‘ਤੇ ਸਵਾਲ ਉਠਾਉਂਦੇ ਹੋਏ ਕਿਹਾ, “ਇਹ ਪਹਿਰਾਵਾ ਰੱਖੜੀ ਵਰਗੇ ਰਵਾਇਤੀ ਤਿਉਹਾਰ ਲਈ ਅਣਉਚਿਤ ਹੈ।” ਕ੍ਰਿਤੀ ਸੈਨਨ ਦੀ ਪ੍ਰਤੀਕਿਰਿਆ ਤੋਂ ਬਾਅਦ, ਜੂਲਰੀ ਬ੍ਰਾਂਡ, GIVA ਨੇ ਹੁਣ ਇਸ਼ਤਿਹਾਰ ਵਾਪਸ ਲੈ ਲਿਆ ਹੈ। ਹਾਂਜੀ, ਟ੍ਰੋਲਿੰਗ ਤੋਂ ਬਾਅਦ ਕੰਪਨੀ ਨੇ ਪੂਰਾ ਬਿਆਨ ਜਾਰੀ ਕੀਤਾ ਗਿਆ ਹੈ। ਕੰਪਨੀ ਨੇ ਕਿਹਾ, “ਸਾਨੂੰ ਭਾਰਤੀ ਸੱਭਿਆਚਾਰ, ਪਰੰਪਰਾਵਾਂ ਅਤੇ ਤਿਉਹਾਰਾਂ ਦਾ ਪੂਰਾ ਸਤਿਕਾਰ ਹੈ।”

ਜੂਲਰੀ ਬ੍ਰਾਂਡ Giva ਦੇ ਅਧਿਕਾਰਤ ਇੰਸਟਾਗ੍ਰਾਮ ਅਕਾਊਂਟ ‘ਤੇ ਲਿਖਿਆ ਹੈ, “ਸਾਨੂੰ ਭਾਰਤੀ ਸੱਭਿਆਚਾਰ, ਪਰੰਪਰਾਵਾਂ ਅਤੇ ਤਿਉਹਾਰਾਂ ਲਈ ਸਭ ਤੋਂ ਵੱਧ ਸਤਿਕਾਰ ਅਤੇ ਡੂੰਘਾ ਸਨਮਾਨ ਹੈ। ਇੱਕ ਬ੍ਰਾਂਡ ਦੇ ਤੌਰ ‘ਤੇ, ਅਸੀਂ ਹਮੇਸ਼ਾ ਪੂਰੇ ਪਰਿਵਾਰ ਨਾਲ ਇਨ੍ਹਾਂ ਖੁਸ਼ੀ ਦੇ ਪਲਾਂ ਨੂੰ ਮਨਾਉਣ ਵਿੱਚ ਵਿਸ਼ਵਾਸ ਰੱਖਦੇ ਹਾਂ। ਅਤੇ ਇਸ ਵਾਰ, ਅਸੀਂ ਇਸ ਪਿਆਰ ਅਤੇ ਜਸ਼ਨ ਨੂੰ ਆਪਣੇ ਪਾਲਤੂ ਜਾਨਵਰਾਂ ਤੱਕ ਵੀ ਪਹੁੰਚਾਉਣਾ ਚਾਹੁੰਦੇ ਸੀ। ਜੇਕਰ ਸਾਡੇ ਹਾਲੀਆ ਇਸ਼ਤਿਹਾਰ ਨੇ ਅਣਜਾਣੇ ਵਿੱਚ ਸਮਾਜ ਦੇ ਕੁਝ ਵਰਗਾਂ ਦੀਆਂ ਭਾਵਨਾਵਾਂ ਨੂੰ ਠੇਸ ਪਹੁੰਚਾਈ ਹੈ, ਤਾਂ ਸਾਡਾ ਅਜਿਹਾ ਕਰਨ ਦਾ ਕੋਈ ਇਰਾਦਾ ਨਹੀਂ ਸੀ। ਸਤਿਕਾਰ ਵਜੋਂ, ਅਸੀਂ ਸਾਰੇ ਪਲੇਟਫਾਰਮਾਂ ਤੋਂ ਇਸ਼ਤਿਹਾਰ ਵਾਪਸ ਲੈ ਲਿਆ ਹੈ।” ਪਹਿਲਾਂ, ਕ੍ਰਿਤੀ ਸੈਨਨ ਨੇ ਵੀ ਟ੍ਰੋਲਸ ਨੂੰ ਜਵਾਬ ਦਿੱਤਾ ਸੀ।

ਟ੍ਰੋਲਿੰਗ ਤੋਂ ਬਾਅਦ ਕ੍ਰਿਤੀ ਨੇ ਦਿੱਤਾ ਸੀ ਜਵਾਬ

ਦਰਅਸਲ, ਕ੍ਰਿਤੀ ਸੈਨਨ ਨੇ ਆਪਣੀ ਇੰਸਟਾਗ੍ਰਾਮ ਸਟੋਰੀ ‘ਤੇ ਆਲੋਚਕਾਂ ਨੂੰ ਜਵਾਬ ਦਿੱਤਾ, ਪੂਰੇ ਵਿਵਾਦ ਦਾ ਜਵਾਬ ਦਿੱਤਾ। ਉਨ੍ਹਾਂ ਨੇ ਲਿਖਿਆ ਸੀ, “ਅਸੀਂ ਔਰਤਾਂ ਨੂੰ ਇਹ ਦੱਸਣਾ ਕਦੋਂ ਬੰਦ ਕਰਾਂਗੇ ਕਿ ਉਨ੍ਹਾਂ ਨੂੰ ਕੀ ਪਹਿਨਣਾ ਚਾਹੀਦਾ ਹੈ? ਸਾਡੀ ਸੰਸਕ੍ਰਿਤੀ ਅਤੇ ਪਰੰਪਰਾਵਾਂ ਸਾਡੇ ਦਿਲਾਂ ਵਿੱਚ ਰਹਿੰਦੀਆਂ ਹਨ, ਸਾਡੇ ਕੱਪੜਿਆਂ ਦੀ ਨੈਕਲਾਈਨ ਵਿੱਚ ਨਹੀਂ।” ਇਸ ਦੌਰਾਨ, ਕੁੱਤੇ ਨੂੰ ਰੱਖੜੀ ਬੰਨ੍ਹਣ ਦੇ ਦ੍ਰਿਸ਼ ਦਾ ਬਚਾਅ ਕਰਦੇ ਹੋਏ, ਕ੍ਰਿਤੀ ਨੇ ਕਿਹਾ, “ਰੱਖੜੀ ਸੁਰੱਖਿਆ ਦਾ ਵਾਅਦਾ ਅਤੇ ਪ੍ਰਾਰਥਨਾ ਹੈ… ਸਾਡੇ ਲਈ, ਸੁਰੱਖਿਆ ਦਾ ਇਹ ਵਾਅਦਾ ਸਾਡੇ ਕੁੱਤਿਆਂ ਤੱਕ ਵੀ ਜਾਂਦਾ ਹੈ, ਕਿਉਂਕਿ ਉਹ ਵੀ ਸਾਡੇ ਪਰਿਵਾਰ ਦਾ ਹਿੱਸਾ ਹਨ।” ਹਾਲਾਂਕਿ, ਜੂਲਰੀ ਬ੍ਰਾਂਡ ਨੇ ਹੁਣ ਕਿਹਾ ਹੈ ਕਿ ਉਸਦਾ ਇਰਾਦਾ ਕਿਸੇ ਦੀਆਂ ਧਾਰਮਿਕ ਜਾਂ ਸੱਭਿਆਚਾਰਕ ਭਾਵਨਾਵਾਂ ਨੂੰ ਠੇਸ ਪਹੁੰਚਾਉਣ ਦਾ ਨਹੀਂ ਸੀ।

ਕੰਗਨਾ ਰਣੌਤ ਨੇ ਉਠਾਏ ਸਨ ਸਵਾਲ

ਕੰਗਨਾ ਰਣੌਤ ਨੇ ਆਪਣੀ ਇੰਸਟਾਗ੍ਰਾਮ ਸਟੋਰੀ ‘ਤੇ ਇਸ਼ਤਿਹਾਰ ਦੀ ਤਿੱਖੀ ਆਲੋਚਨਾ ਕੀਤੀ, ਇਸਨੂੰ “ਜਾਣਬੁੱਝ ਕੇ ਅਜੀਬ” ਦੱਸਿਆ ਅਤੇ ਕਿਹਾ ਕਿ ਆਧੁਨਿਕਤਾ ਦੇ ਨਾਮ ‘ਤੇ ਭਾਰਤੀ ਤਿਉਹਾਰਾਂ ਦੀ ਨਿੱਘ ਅਤੇ ਸਾਦਗੀ ਨੂੰ ਢਾਹ ਨਹੀਂ ਲਗਾਈ ਜਾਣੀ ਚਾਹੀਦੀ।